賣女孩的小火柴（上）
喺最無助、最絕望嘅時候，有陌生人向你伸出援手，係咩感覺？
十七歲嗰年，我試過呢種感覺。
我啱啱中學畢業，考唔到大學，同父母嘈交，拎住少少錢就離家出走。
依加諗番轉頭，嗰陣都係一時意氣，如果我冇唔見銀包，應該會玩幾日，差唔多用晒啲錢就自己返屋企。
我搭火車去到另一個城市，諗緊去邊度玩，想數吓自己有幾多錢，摸吓個銀包，居然唔見咗！
啱啱落火車嗰陣，有人撞一撞我，肯定係俾人偷咗。
我下意識大叫：「我個銀包唔見咗，邊個偷咗我銀包？」
路人用奇異嘅目光望住我，但冇一個人想幫我。
正當我手足無措，有一個三十幾歲嘅女人行埋嚟：「小妹妹，你唔見咗銀包，你想去邊啊？」
「我想返屋企。」呢一刻，我已經冇興趣同父母鬥氣，我好慌張，好想返屋企。
女人微笑：「咦，我都住嗰邊，我幫你買車票啦。」
筆墨難以形容我嘅感動，我幾乎喊咗出嚟：「你跟我一齊返屋企，我一定還番錢畀你。」
我同佢一齊搭車，我知道佢叫梅姐，係開公司嘅。
「呢排諗住開分店，想搵幾個女仔去做文職。你第日有興趣嘅，咪嚟見工囉。」梅姐輕描淡寫咁講。
我哋有講有笑，好快火車就到站。
我屋企比較偏遠，搭完火車仲要轉巴士先返到去，換句話講，又要問梅姐借錢。
梅姐提議：「我舅父屋企喺呢度附近，不如你陪我返一返去先？之後再一齊去你屋企。」
於是，我就跟咗梅姐去佢舅父屋企。
梅姐嘅舅父舅母都好熱情，我哋傾咗一陣，舅母出咗去，帶咗一個好瘦嘅男人返嚟，話係朋友。
奇怪地，瘦男人一入到屋，就上下打量我，好似望緊一件貨物咁。
我俾佢望到周身唔舒服，唔想留喺客廳，就話有啲攰想休息一陣，梅姐帶咗我入客房，幫我鎖埋門。
我關咗門，腦裡不斷諗起嗰個奇怪嘅瘦男人。
我將耳仔貼喺門板上，好彩我聽力比一般人好，勉強可以偷聽到佢哋嘅對話。
我聽到梅姐讚我後生，個男人話我生得唔夠靚。
佢哋討價還價，最後梅姐以四千蚊嘅價格，將我賣畀嗰個男人做老婆。
梅姐話，今晚就會將我送過去。
我個心跳得好快，梅姐已經將交易安排好，佢一定會對我嚴防死守，唔畀我有機會逃跑。
佢哋有三個人，我得一個人。
我唯一嘅優勢，就係「梅姐仲未知，我知道真相」。
於是，我扮晒平靜咁訓番落床。
到梅姐入嚟搵我，我睡眼惺忪咁同佢講，我有三個好姐妹，都入唔到大學。
我哋講過要「有福同享」，我想帶佢哋一齊去梅姐間公司見工。
我清晰地見到，梅姐雙眼一亮，係貪婪嘅光芒，佢肯定想賣埋我嘅好姐妹。
梅姐帶我離開呢度，搭車返去我屋企嗰個鎮，住咗入一間旅館，叫我去搵幾個好姐妹過嚟。
下集：http://bit.ly/3dQEqeO
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #賣女孩的小火柴
Search